Тензиите во Персискиот Залив повторно драматично ескалираа откако американската Централна команда соопшти дека американски воени бродови биле цел на координиран напад додека пловеле низ Ормускиот Теснец, една од најчувствителните и најважни поморски рути во светот.
Според тврдењата на Вашингтон, три американски разурнувачи биле нападнати со ракети, беспилотни летала и брзи ирански пловила за време на нивниот премин кон Оманскиот Залив. Американската страна наведува дека нападот бил „неиспровоциран“, но дека ниту еден од бродовите не бил погоден.
Одговорот, како што велат од американската војска, следувал веднаш. САД извршиле серија одбранбени воздушни удари врз ирански воени позиции за кои тврдат дека биле директно поврзани со нападите. Меѓу погодените цели се споменуваат лансирни рампи за ракети и дронови, командни пунктови, како и системи за надзор и разузнавање.
Од Централната команда порачаа дека американските сили не бараат поширок конфликт, но нагласија дека остануваат подготвени за „решителна заштита“ на своите воени капацитети и персонал во регионот.
Инцидентот предизвика силна реакција и од американскиот претседател Доналд Трамп, кој настапи со остар тон кон Техеран. Тој оцени дека американските бродови успешно ја минале опасната рута „под оган“, додавајќи дека иранските сили претрпеле „големи последици“.
„Доколку Иран брзо не се согласи на договор, идните одговори ќе бидат уште посилни и пожестоки“, изјави Трамп, додавајќи дека американската морнарица продолжува со, како што ја нарече, „челичната блокада“ во регионот.
…
