Туристичката сезона на Халкидики започна со солидна посетеност за време на првомајските празници, но хотелиерите предупредуваат дека регионот се соочува со сериозни предизвици кои можат да влијаат врз летниот туризам.
Според податоците од туристичкиот сектор, сите хотели биле отворени за празничниот викенд, со просечна пополнетост од околу 75 проценти, а најголем дел од гостите пристигнале од балканските земји.
Сепак, резервациите за летната сезона се пониски за 8 до 10 проценти во споредба со лани, а се очекува просечната пополнетост во текот на сезоната да се движи меѓу 60 и 65 проценти.
Претседателот на Здружението на хотелиери на Халкидики, Григорис Тасиос, изјави дека регионот ги чувствува последиците од конфликтите на Блискиот Исток, но дека патниот туризам од Балканот и Турција останува стабилен.
Дополнителен проблем за туристичкиот сектор е недостигот на работна сила. Во хотелите моментално недостигаат околу 1.500 работници, главно поради долгите процедури за издавање визи за странски сезонски работници.
Хотелиерите наведуваат дека иако имало голем интерес за рани резервации, продажбата на „all inclusive“ аранжманите значително забавила.
Во меѓувреме, Халкидики се обидува да привлече туристи и од нови пазари, како Полска и Италија, додека балканските гости и натаму сочинуваат околу половина од вкупните резервации. Најбројни се туристите од Бугарија, Романија и Србија, а раст бележат и гостите од Македонија, Албанија и Косово.
Хотелиерите предупредуваат и на долгогодишните инфраструктурни проблеми во регионот, меѓу кои недостиг на вода, стара водоводна мрежа, недоволни системи за отпадни води и лоша патна инфраструктура, особено на Ситонија.
Туристичкиот сектор внимателно ја следи и можноста за дополнителни гужви на границите поради воведувањето на новиот европски систем за биометриска контрола при влез и излез од ЕУ.
Според грчките медиуми, и покрај предизвиците, надежите остануваат дека главниот летен бран туристи ќе ја подобри состојбата во текот на сезоната.
