Денеска се навршуваат 11 години од вооружената антитерористичка акција во кумановската населба „Диво насеље“, која се случи на 9 и 10 мај 2015 година и во која животот го загубија осум припадници на безбедносните сили.
Во 28-часовната акција, која започна во раните утрински часови и траеше до следниот ден, беа ангажирани специјалните полициски единици во борба со вооружена група, при што покрај загинатите, беа повредени и 37 полицајци. По завршувањето на операцијата, дел од припадниците на групата се предале, а повеќе лица подоцна беа кривично процесуирани.
Во чест на загинатите припадници на безбедносните сили, во кругот на СВР Куманово беше откриена спомен-плоча, а во централното градско подрачје е поставен и мурал со порака „Хероите живеат вечно“.
Во акцијата животот го загубија полициските службеници Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимовски и Горан Стојменовиќ, кои постхумно беа одликувани со медали за храброст.
Одбележувањето започна со панихида во Соборниот храм „Свети Никола“, по што следеше положување цвеќе пред спомен-обележјето во кругот на СВР Куманово. Во текот на денот се одржуваат и меморијални спортски и хуманитарни активности под мотото „Хероите живеат вечно“.
Куманово и денес се сеќава на драматичните настани од 2015 година, кога населбата „Тоде Мендол“, позната како „Диво насеље“, беше под целосна блокада, а граѓаните беа евакуирани поради интензивните престрелки. Жителите и понатаму порачуваат дека вакви трагични настани никогаш не смеат да се повторат.
…
