Иако календарски сме веќе на средината на мај и многумина очекуваат стабилно пролетно време, Балканот повторно го очекува силен временски пресврт. Според најавите на метеоролозите, од вторник, 12 мај 2026 година, регионот ќе биде зафатен од нов изразено ладен бран кој ќе се спушти од северозападна Европа преку Алпскиот регион и ќе донесе драстична промена на времето.
Се очекува нагло заладување проследено со пад на температурите за 10 до 15 степени, а локално и повеќе од тоа. Покрај значително посвежото време, прогнозите најавуваат силен ветер, врнежи од дожд и појава на снег на повисоките планински места во делови од Балканот.
Метеоролозите предупредуваат дека временската промена ќе биде брза и изразена, што ќе предизвика вистински температурен шок по релативно топлиот период кој му претходеше.
Поголем пад на температурите се очекува и во Македонија, особено од ноќта кон среда, односно меѓу 12 и 13 мај. Според прогнозите, земјава ќе почувствува значително посвеж воздух, а нестабилното време ќе донесе локални врнежи и засилен ветер.
Не се исклучува можноста на повисоките планински места во регионот да се формира и снежна покривка, што е невообичаено за овој период од годината, но не и невозможно кога студен воздух продира длабоко кон Балканот.
Експертите предупредуваат дека наглата промена на времето може особено негативно да влијае врз метеопатите и хронично болните лица. Можно е појавување на главоболки, замор, проблеми со крвниот притисок, болки во коските и зглобовите, како и чувство на исцрпеност и нервоза кај чувствителните категории граѓани.
Лекарите советуваат граѓаните да внимаваат на здравјето, да избегнуваат нагли температурни разлики, редовно да внесуваат течности и да бидат внимателни при престој на отворено во деновите кога се очекува засилен ветер и нестабилно време.
Метеоролозите во наредните денови ќе продолжат внимателно да ја следат состојбата, бидејќи постои можност студениот бран дополнително да се интензивира во одредени делови од Балканот.
