Во завршна фаза е реконструкцијата на спортските игралишта во рамките на подрачното училиште „Тодор Ангелевски“ во населбата Горно Оризари, каде што се обновуваат два спортски терени – ракометно игралиште, кое ќе се користи и за мал фудбал, како и кошаркарски терен.
Градоначалникот на Битола, Орце Ѓорѓиевски, денеска изврши увид во градежните активности, при што истакна дека станува збор за значајна инвестиција во подобрување на условите за спорт и рекреација кај младите.
„Верувам дека овие нови и современи терени ќе бидат максимално искористени од учениците и младите од Горно Оризари за секојдневни спортски активности. Општината продолжува со вложувања во училишната спортска инфраструктура, затоа што сакаме децата да имаат безбедни и современи услови за развој и рекреација“, изјави Коњановски.
Со реконструкцијата, целосно е отстранет стариот асфалтен и бетонски слој, по што е извршено тампонирање, асфалтирање и поставување тартан подлога на површина од околу 900 квадратни метри.
Терените се оградени со заштитна мрежеста ограда висока околу три метри, а ќе бидат опремени и со нови спортски реквизити. Во рамките на проектот се уредуваат и нови патеки со бехатон плочки, како и простор со елементи за училница на отворено.
Дополнително, игралиштата добиваат осветлување за користење и во вечерните часови, поставени се безбедносни камери, а просторот околу нив ќе биде хортикултурно уреден.
Проектот се реализира со средства обезбедени преку Министерството за образование и наука од вториот владин повик, а вкупната инвестиција изнесува 11.318.523 денари.
…
