Во Брисел денеска се одржа Советот за надворешни работи на Европската Унија, на кој учествуваше министерот за надворешни работи и надворешна трговија, Тимчо Муцунски. Состанокот го водеше високата претставничка на ЕУ за надворешни работи и безбедносна политика, Каја Калас, а главниот фокус беше насочен кон односите со Западен Балкан и пошироките геополитички предизвици.
Пред почетокот на дебатите, Муцунски порача дека проширувањето на Унијата не е само политички процес, туку суштинска нужност и за ЕУ и за земјите-кандидати. Според него, Западен Балкан мора конечно да излезе од позицијата на „сива зона“ во Европа и да добие јасна перспектива за членство преку предвидлив и кредибилен процес.
Тој нагласи дека Македонија бележи конкретен напредок во спроведувањето на Реформската агенда, особено во последниот период, и истакна дека државата е целосно усогласена со Заедничката надворешна и безбедносна политика на ЕУ. Тоа, како што посочи, претставува потврда за цврстата реформска определба, но и за недвосмислената стратешка ориентација кон европската интеграција.
Во своето обраќање, министерот испрати порака до земјите членки дека процесот на проширување мора да се ослободи од билатерални блокади кои го забавуваат напредокот, а воедно повика на засилен ангажман на ЕУ и во пошироки области од заеднички интерес. Тој ги посочи безбедноста и одбраната, економијата и трговијата, енергетската стабилност, сигурноста на храната и дигиталната трансформација како клучни полиња за продлабочена соработка.
Дискусиите на Советот опфатија повеќе актуелни теми, меѓу кои односите со земјите од Западен Балкан, руската агресија врз Украина и нејзините регионални импликации, како и зајакнувањето на заедничките капацитети на ЕУ во сферата на надворешната и безбедносната политика.
Муцунски воедно ја истакна подготвеноста на државата да остане сигурен и предвидлив партнер на Европската Унија во справувањето со глобалните безбедносни ризици, нагласувајќи дека усогласеноста со европската надворешна политика останува конзистентна и стабилна.
Посебно внимание, како што беше посочено на состанокот, доби и прашањето за проширувањето во новиот геополитички контекст. Притоа беше нагласено дека тоа не е само институционално прашање, туку стратешка инвестиција во долгорочната стабилност, безбедност и отпорност на Европа и нејзиното соседство.
…
