Светската здравствена организација објави дека бројот на регистрирани случаи на хантавирус продолжува да расте, а во најновиот извештај се наведува дека досега се евидентирани девет случаи на инфекција.
Според СЗО, седум од случаите се потврдени во тековниот бран на ширење на вирусот, а најновиот заразен пациент е регистриран во Франција.
Француската министерка за здравство Стефани Рис изјави дека една жена, која неодамна се вратила од Тенерифе, е хоспитализирана и нејзината состојба е сериозно влошена откако била позитивна на вирусот.
Медиумите наведуваат дека официјалниот број на заразени не ги опфаќа и информациите од американските здравствени власти, според кои еден Американец имал слаб позитивен тест на хантавирус, но без симптоми. Тој бил дел од групата од 17 патници кои се вратиле во САД од крузерот „MV Hondius“.
Токму на овој брод бил идентификуван и таканаречениот нулти пациент – седумдесетгодишен Холанѓанец, страствен орнитолог, кој патувал низ Јужна Америка со својата сопруга. Двајцата подоцна починале од последиците на вирусот.
Според француските медиуми, брачната двојка за време на патувањето посетила депонија во Аргентина со цел да набљудува ретки птици, што се смета за можна локација на заразување.
Лео Шилперорд прв ги покажал симптомите на вирусот и починал на 11 април на бродот „MV Hondius“, додека неговата сопруга Миријам починала две недели подоцна.
Двојката од Холандија кон крајот на минатата година заминала на повеќемесечна тура низ Аргентина, Чиле и Уругвај, комбинирајќи патување и набљудување птици, што било нивна долгогодишна страст.
…
