Долгот на фирми и граѓани кон Управата за јавни приходи повторно се зголемува, покажуваат најновите податоци од институцијата. Според ажурираната листа, вкупно 5.018 субјекти не ги подмириле своите обврски по основ на даноци, царини и акцизи заклучно со 31 јануари 2026 година, а рокот за плаќање бил до крајот на април.
Вкупниот нето-долг достигнува околу 197 милиони евра, односно 12.127.971.312 денари, што претставува пораст од 141,3 милиони денари во однос на претходната објава. Најголемиот дел од обврските се однесуваат на даноци и придонеси, кои изнесуваат 11.938.936.253 денари и бележат раст од над 131 милион денари. Дополнително, долгот по основ на царински давачки се искачува на 189.035.059 денари, што е зголемување од околу 10,3 милиони денари.
Во структурата на должниците, 1.954 се правни лица, што претставува мало зголемување, додека бројот на физички лица се намалил на 3.064. Најголем дел од листата се повторуваат должници од претходната објава – вкупно 4.811 субјекти.
Кај нив се забележуваат различни движења: над 3.000 должници го зголемиле својот долг за дополнителни 177 милиони денари, додека 262 успеале да го намалат за околу 207 милиони денари. За 1.458 должници состојбата останала непроменета.
Дополнително, на листата се појавуваат и 207 нови должници со вкупен долг од околу 418 милиони денари.
Од Управата за јавни приходи најавуваат дека во следната објава ќе бидат објавени и информации за мерките што се преземаат за наплата на долговите од наведените субјекти.
…
