Осумдесет и деветгодишен жител на Росоман загина вечерва во тешка сообраќајна несреќа на регионалниот пат Градско – Прилеп, откако во него удрило товарно возило.
Несреќата се случила околу 18:55 часот во Росоман, а информацијата за МИА ја потврди портпаролката на СВР Велес, Ана Милевска Ѓеоргиева.
„Денеска во ОВР – Кавадарци пријавено е дека во 18:55 часот на регионален пат Градско-Прилеп, во Росоман, товарно возило „сканиа“ со кавадаречки регистарски ознаки со приколка управувано од Р.Љ., на возраст од 45 години од Кавадарци, удрило во пешак К.Ѓ., на 89-годишна возраст од Росоман. Од повредите, на местото на несреќата починал пешакот, а смрт констатирал лекар од Итна медицинска помош – Кавадарци“, појасни Милевска Ѓеоргиева.
За случајот бил известен јавен обвинител, а увид на местото врши екипа од ОВР Кавадарци.
Поради несреќата, сообраќајот на патниот правец Градско – Прилеп е во прекин и се пренасочува по регионалните патишта Р103 и Р107.
…
