Техеран и Вашингтон повторно влегоа во остар вербален судир откако иранското раководство категорично го отфрли американскиот предлог за запирање на конфликтот на Блискиот Исток, оценувајќи го како обид за капитулација на Исламската Република.
Иранските државни медиуми објавија дека понудата од САД била неприфатлива бидејќи, според Техеран, подразбирала покорување на барањата на американскиот претседател Доналд Трамп. Телевизијата Press TV, која важи за медиум близок до иранскиот државен врв, порача дека Иран нема да прифати „диктирани услови“ под политички и воен притисок.
Наместо тоа, иранската страна излегла со сопствена иницијатива: итен прекин на судирите на сите фронтови, но и барање САД да сносат одговорност и да исплатат воени репарации. Според извештаите на државните медиуми, иранското раководство веќе донело одлука американскиот план целосно да го отфрли.
Во меѓувреме, Трамп реагираше со жесток тон. Во изјава за американскиот портал „Аксиос“, тој кратко порача дека одговорот на Иран е „несоодветен“, без да открие детали од комуникацијата меѓу двете страни.
Подоцна, преку својата платформа Truth Social, американскиот претседател дополнително ја засили реториката.
„Тукушто го прочитав одговорот од таканаречените претставници на Иран. Не ми се допаѓа, ТОТАЛНО НЕПРИФАТЛИВО!“, напиша Трамп, ставајќи до знаење дека Вашингтон нема намера лесно да отстапи од своите позиции.
…
