Вицепремиерот и министер за транспорт Александар Николоски информира дека изградбата на автопатската делница Кичево – Охрид се приближува кон својата завршна фаза. Тој сподели и видео од теренот, нагласувајќи дека градежните работи на преостанатите делови се одвиваат со засилен интензитет.
Во својата порака, Николоски посочи дека во изминатите две години значително е напреднато на теренот и изрази очекување дека наскоро граѓаните ќе добијат можност да сообраќаат по новиот автопат. Според него, станува збор за проект кој е симбол на тековните инфраструктурни активности во државата.
Истовремено, министерот најави дека целиот автопат ќе биде ставен во функција во првата половина од следната година, со што повторно ја потврди претходно изнесената временска рамка.
Изградбата на оваа делница започна уште во мај 2014 година, но во изминатата деценија проектот се соочи со повеќекратни одложувања, измени и зголемување на трошоците, што значително го пролонгираше неговото завршување.
Денес, на терен се изведуваат работи на преостанатите тунелски делници, косини, клучки и безбедносна инфраструктура. Надлежните институции уверуваат дека овојпат динамиката е стабилна и дека нема да има нови одлагања до целосното пуштање на автопатот во употреба.
…
