Meta повторно ја менува насоката на своите комуникациски сервиси, овојпат со значајна промена во начинот на кој функционираат пораките на Instagram. Компанијата повеќе не ја поддржува опцијата за end-to-end енкрипција во директните разговори, со што дел од корисниците остануваат без дополнителниот слој приватност што можеше да се активира рачно.
Иако оваа функција постоела како избор, таа никогаш не била стандардна поставка, па поголемиот дел од корисниците практично и не ја користеле. Во Meta велат дека токму тоа е причината зошто се укинува: била премногу малку применета за да се оправда нејзиното одржување. За оние кои сакаат разговори целосно заштитени од пристап на платформата, компанијата јасно ги пренасочува кон WhatsApp, каде енкрипцијата е вградена во основата на апликацијата.
Со ваквата заштита, пораките се „заклучени“ меѓу два уреда, што значи дека ниту самата платформа не може да ја види нивната содржина. Отсуството на оваа функција на Instagram отвора поширок простор за обработка на податоци преку системи за безбедност, модерирање и внатрешни проверки.
Промената не помина тивко, напротив, повторно ја разгоре долгогодишната расправа околу тоа каде треба да се повлече границата меѓу приватноста на корисниците и потребата од контрола на онлајн содржината. Дел од организациите што работат на заштита на малолетници и безбедност на интернет сметаат дека силната енкрипција понекогаш ја отежнува борбата против злоупотреби. Од друга страна, застапниците за дигитални права предупредуваат дека секое намалување на приватноста претставува ризик за слободата на комуникацијата.
Во наредниот период, корисниците кои имале активирани заштитени разговори ќе добијат известувања како да ги сочуваат своите податоци, фотографии и пораки пред промената целосно да се имплементира. Meta, пак, останува доследна на WhatsApp како главна платформа со целосна енкрипција како стандарден дел од услугата.
…
