Француска државјанка е во исклучително тешка здравствена состојба откако за време на патување со крузерот „Хондиус“ се заразила со хантавирус, поради што моментално е приклучена на апарат кој ја презема функцијата на срцето и белите дробови. Пациентката се лекува во париската болница „Биша“, каде лекарите се борат за нејзиниот живот.
Инфектологот д-р Ксавие Лекјур објаснува дека болеста кај неа предизвикала сериозни компликации, со директно оштетување на кардиопулмоналниот систем. Според него, употребата на екстракорпорална поддршка е последна, но во моментов неопходна мерка за одржување на виталните функции.
„Овој уред ја презема работата на срцето и белите дробови, овозможувајќи оксигенација на крвта и нејзино враќање во организмот. Се надеваме дека на овој начин ќе се намали оптоварувањето на органите и ќе се создадат услови за опоравување“, наведува Лекјур, нагласувајќи дека станува збор за критична фаза од терапијата.
Здравствените власти потврдуваат дека досега се поврзани 11 случаи со истиот крузер „Хондиус“, од кои девет лабораториски се потврдени. Во епидемиолошкиот биланс се регистрирани и три смртни исходи, меѓу кои и брачен пар од Холандија.
Крузерот е упатен кон пристаниште во Холандија, каде ќе следува детална дезинфекција и истрага за можниот извор на заразата. Од Светската здравствена организација, генералниот директор Тедрос Аданом Гебрејесус порачува дека засега нема индикации за широка епидемија, иако случајот внимателно се следи.
…
