Волстрит во вторникот ја загуби еуфоријата од почетокот на неделата, откако новите инфлациски податоци повторно ги разнишаа инвеститорите и предизвикаа силен притисок врз технолошкиот сектор. Додека цените на нафтата експлодираа поради растечките тензии меѓу САД и Иран, најголемите берзански индекси се повлекоа од неодамнешните рекордни нивоа.
Широкиот индекс S&P 500 ослабе за 0,3%, Nasdaq Composite потона за 1,1%, додека Dow Jones Industrial Average остана речиси без промена, движејќи се околу нулата. Најсилниот удар повторно го претрпеа производителите на чипови, кои само ден претходно беа двигатели на растот на пазарот.
Откако во понеделникот помогна индексите да стигнат до нови максимуми, Micron Technology во вторникот изгуби повеќе од 10% од вредноста. Инвеститорите почнаа масовно да ги затвораат позициите по вртоглавиот раст од над 37% во само една недела и повеќе од 50% во последниот месец, поттикнат од огромната побарувачка за мемориски чипови.
Негативниот бран се прошири и врз Advanced Micro Devices и Qualcomm. AMD ослабе за околу 6%, а Qualcomm забележа уште подлабок пад од 14%, иако двете компании претходно бележеа спектакуларни добивки во изминатите недели.
Во исто време, енергетските пазари испратија алармантен сигнал. Американската сурова нафта West Texas Intermediate скокна над 101 долар за барел, додека Brent надмина 107 долари, откако геополитичките ризици на Блискиот Исток повторно се интензивираа.
Причина за новата нервоза беа изјавите на американскиот претседател Donald Trump, кој остро го нападна едномесечното примирје меѓу САД и Иран, оценувајќи го како „крајно нестабилно“ и неодржливо. Дополнителна загриженост предизвикаа и барањата на Техеран во последната контрапонуда — воени репарации, целосна контрола врз Ормутскиот теснец, одмрзнување на иранските средства и укинување на санкциите.
Инвеститорите стравуваат дека евентуална ескалација би можела дополнително да ги зголеми цените на енергенсите и повторно да ја разгори инфлацијата, токму во момент кога американската економија покажува знаци на забавување.
Таа загриженост дополнително ја засилија и најновите податоци за инфлацијата. Според американското Биро за статистика на трудот, индексот на потрошувачки цени во април пораснал за 0,6%, додека годишната инфлација достигнала 3,8%. Иако месечниот раст беше во линија со очекувањата, годишната стапка сепак ги надмина прогнозите на аналитичарите, кои очекуваа инфлација од 3,7%.
Ова е највисоко инфлациско ниво забележано од мај 2023 година и уште еден сигнал дека Федералните резерви би можеле подолго да ги задржат високите каматни стапки.
…
