Германската организација за заштита на потрошувачите во Хамбург отвори спор против прехранбениот гигант „Mondelez“, обвинувајќи го дека без јасно и навремено информирање ја намалил грамажата на популарните чоколади „Милка“, додека нивната цена на полиците продолжила да расте.
Во центарот на случајот се наоѓа наводната промена која, според тужителите, поминала речиси незабележано за купувачите: чоколадните табли, кои со години биле стандардно по 100 грама, биле намалени на околу 90 грама, но визуелниот изглед на амбалажата останал речиси идентичен. Истовремено, малопродажната цена се зголемила од 1,49 на 1,99 евра, што дополнително ги засили обвинувањата за „скриено поскапување“.
Случајот моментално се разгледува пред Регионалниот суд во Бремен, каде судиите во првичната расправа посочиле дека ваквата практика потенцијално може да се толкува како доведување на потрошувачите во заблуда преку т.н. измамничко пакување.
Од потрошувачкиот центар во Хамбург тврдат дека станува збор за типичен пример на „shrinkflation“: феномен при кој производот се намалува по количина, додека цената останува иста или се зголемува, а визуелниот идентитет на производот речиси не се менува, што ја отежнува забелешката на промената кај купувачите.
Од друга страна, „Mondelez“ ги отфрла ваквите обвинувања. Компанијата тврди дека новата тежина е јасно наведена на пакувањето и дека потрошувачите биле информирани преку нивните официјални канали, вклучително и веб-страницата и социјалните мрежи. Како главна причина за промените, производителот ги наведува значително зголемените трошоци во глобалниот синџир на снабдување, особено поскапувањето на суровото какао.
Во поширок контекст, пазарот на чоколадо во Европа во последните години бележи силен ценовен притисок. Лошите временски услови, растителните болести и намалените приноси во Западна Африка, клучниот регион за производство на какао, доведоа до недостиг на суровина и значителен раст на цените.
Статистичките податоци покажуваат дека чоколадото денес чини значително повеќе отколку во 2020 година, што веќе влијае и врз навиките на потрошувачите, кои сè почесто бараат помали или поевтини алтернативи.
…
