Синоќа Дњепропетровската област повторно беше погодена од интензивен бран напади, во кои животот го загубија најмалку осум лица, а 11 се повредени, соопштува „Украинска правда“, повикувајќи се на украинските власти.
Нападите, кои започнале по 20 часот, биле насочени кон три окрузи и, според извештаите, во текот на вечерта биле регистрирани речиси триесет одделни удари.
Најтешка е состојбата во Криви Рих, каде загинале две лица: 65-годишна жена и 43-годишен маж. Таму се повредени уште четири луѓе, меѓу кои и деветмесечно бебе. Тројца од ранетите се задржани во болница, а еден 50-годишен маж се наоѓа во критична состојба.
Трагични вести пристигнуваат и од Синелниковскиот округ. Во хромадата Дубовики животот го загубиле четири лица, додека три се повредени. Дополнително, во хромадата Миколајивка се пријавени уште две жртви.
Под постојан притисок бил и Никополскиот округ, каде биле опфатени градот Никопол и неколку околни хромади, меѓу кои Марханец, Мирова, Покровске и Червонохрихоривка. Нападите оставиле зад себе оштетена инфраструктура, уништени домови и оштетени возила.
Според началникот на Дњепропетровската воена управа, Олександр Ханжа, во тој дел од регионот се повредени три лица, меѓу нив и 16-годишно момче кое е хоспитализирано во средно тешка состојба. Уште еден 16-годишник и 21-годишен маж добиле медицинска помош на лице место и не се задржани во болница.
Исто така, Ханжа и претседателот на Областниот совет, Микола Лукашук, потврдиле дека нападите започнале кратко по 20 часот и се одвивале во неколку последователни бранови, погодувајќи различни делови од регионот.
…
