На конференцијата Бизнис со интегритет, вицепремиерот и министер за транспорт Александар Николоски испрати порака дека без посилна институционална поддршка, домашните компании тешко ќе успеат да се носат со конкуренцијата од странските пазари. Според него, македонските мали и средни претпријатија се ставени во нерамноправна позиција во услови на отворен и либерализиран економски систем, каде големите регионални и меѓународни корпорации располагаат со значително поголем капитал и ресурси.
Николоски оцени дека државата мора да создаде услови јавните инвестиции да придонесуваат за развој на домашната економија, наместо средствата да завршуваат надвор од земјата. Тој предупреди дека доколку продолжи сегашната практика, Македонија ќе се соочи со продлабочување на трговскиот дефицит, нарушување на девизниот баланс и дополнително иселување на работоспособното население поради недостиг од можности за работа.
Во своето обраќање, министерот нагласи дека локалните компании не можат да изградат капацитет и конкурентност ако не добиваат можност да учествуваат во реализација на поголеми инфраструктурни и јавни проекти. Како пример ги посочи тендерите со вредност од неколку стотици илјади евра, за кои смета дека треба да се креира простор поголем дел од работата да ја добиваат фирми од општините каде се реализираат проектите.
Тој се осврна и на условите што ги поставуваат меѓународните финансиски институции при финансирање капитални инвестиции, оценувајќи дека строгите критериуми често уште на почеток ги елиминираат македонските компании од постапките. Според Николоски, неопходно е да се промени таквиот пристап и да се овозможи домашните фирми директно да учествуваат во изградба на крупни инфраструктурни зафати, меѓу кои и автопатите.
Министерот порача дека само преку практично учество во големи проекти, македонските компании ќе можат да стекнат искуство, финансиска стабилност и капацитет за да станат сериозни и конкурентни играчи и на домашниот и на регионалниот пазар.
…
