На отвореното море во близина на Бар се одигра вистинска морска драма што траела речиси дваесет минути, во која црногорскиот репрезентативец во подводен риболов, Душан Вукчевиќ, успеал да совлада туна тешка 82 килограми, улов што тој самиот го опишува како „лов на животот“.
Сè започнало ненадејно, на длабочина од околу 12,5 метри, кога мирната подводна сцена за миг се променила. Малите риби, кои до тој момент се движеле безгрижно, нагло се разбегале: сигнал што искусниот риболовец веднаш го препознал како најавa за пристигнување на голем предатор. Набргу потоа, се појавила џиновската туна.
Вукчевиќ реагирал инстинктивно и испукал, погодувајќи ја рибата во десната странична перка. Иако погодокот бил прецизен, тој не бил доволен за да ја запре моќната морска ѕверка, која продолжила да се движи со неверојатна сила.
Во следните 18 минути започнала исцрпувачка борба на човек против една од најсилните пелагични риби. Туната го влечела низ површината на морето, додека тој се обидувал да ја задржи контролата и да не биде повлечен во длабочините.
Клучниот пресврт дошол со помош од неговиот пријател Бобан Радошевиќ, кој го следел целиот настан од чамец. Во решавачки момент, тој успеал дополнително да ја погоди рибата, што конечно ја прекинало борбата и овозможило нејзино извлекување.
Вукчевиќ подоцна истакнал дека ваквите средби се ретки и исклучително опасни, нагласувајќи дека туната е риба со неверојатна издржливост и сила, која целиот свој живот го поминува во постојано движење и борба за опстанок. „Тоа се суштества што не запираат, постојано пливаат и имаат огромна енергија“, посочил тој, опишувајќи го искуството како едно од најинтензивните во неговата кариера.
…
