Вистинска драма се одвивала денеска на аеродромот во Сплит, откако авион на Croatia Airlines излетал од пистата при полетување кон Франкфурт, поради што аеродромот бил привремено затворен за авионски сообраќај.
Инцидентот се случил околу 13:10 часот, кога летало од типот Airbus A220-300 при забрзување за полетување завршило надвор од пистата, на тревната површина покрај неа.
Во авионот се наоѓале 130 патници и петчлен екипаж. Според првичните информации, сите биле безбедно евакуирани и засега нема податоци за повредени лица.
Поради инцидентот, аеродромот во Сплит бил привремено затворен, што предизвикало доцнења и промени кај дел од летовите. По интервенцијата на надлежните служби и расчистувањето на теренот, пистата повторно била ставена во функција околу 16 часот.
На социјалните мрежи во меѓувреме се појавија и првите снимки од моментот на инцидентот. Видеото, кое брзо стана вирално, покажува како авионот излегува од пистата додека патниците и присутните на аеродромот во паника ја следат ситуацијата.
Според хрватските медиуми, снимката ја направил сплитскиот фотограф Еди Мештровиќ.
Надлежните институции започнаа истрага за утврдување на причините за инцидентот, а засега не е познато што точно довело до излетувањето на авионот од пистата.
