Основното јавно обвинителство побара 48-часовен притвор за 19-годишникот осомничен за убиството во Бојане, поради опасност од бегство, можност за влијание врз сведоци и ризик од повторување на делото.
Од обвинителството информираат дека во тек е прибирање докази за случајот, а издадена е и наредба за обдукција на телото на 18-годишното момче кое беше пронајдено мртво во шумски предел во близина на Сарај.
Според информациите од полицијата, осомничениот бил уапсен откако неговиот татко пријавил дека синот му признал оти на 15 мај со огнено оружје го убил момчето од истото село.
19-годишникот бил приведен во раните утрински часови на 17 мај, а полициските службеници при истрагата ги пронашле телото на жртвата и пиштолот за кој постои сомнение дека бил употребен при убиството.
По целосно документирање на случајот, против осомничениот ќе биде поднесена кривична пријава за кривичното дело „убиство“.
