Собрание на Република Македонија на денешната 102. седница усвои повеќе законски решенија и одлуки, меѓу кои и Законот за младински додаток со кој се воведува финансиска поддршка за младите вработени во реалниот сектор.
Со новиот закон, младите лица до 23 години кои работат во производствени дејности ќе добиваат месечен додаток од 3.000 денари, со цел да се поттикне нивното вработување и задржување во овој сектор.
Пратениците на истата седница го изгласаа и Законот за изменување и дополнување на Законот за индустриски-зелени зони, со кој се врши терминолошко усогласување со новата организација утврдена во Законот за организација и работа на органите на државната управа.
Во делот на одбраната и меѓународната соработка, Собранието донесе и одлука за испраќање припадник на Армија на Република Северна Македонија во Босна и Херцеговина, каде ќе учествува во меѓународната операција на Европска Унија „АЛТЕА“.
Пратениците разгледаа и повеќе иницијативи за автентично толкување на закони, но беше оценето дека нема потреба од дополнително толкување.
Меѓу одбиените иницијативи се барањата за толкување на Законот за данокот на личен доход, поднесени од Оливер Спасовски и Димитар Апасиев, како и барањето за толкување на Законот за финансирање на единиците на локалната самоуправа поднесено од Зоранчо Јованчев.
Без поддршка останаа и двете барања поврзани со статусот и кариерата на државните и административните службеници, поднесени од градоначалникот на Општина Долнени во 2024 и 2025 година.
