Под површината на Охридското Езеро викендов се водеше вистинска битка за зачувување на едно од најголемите природни богатства на Балканот. Од водите кај Автокамп Градиште, десетици нуркачи од четири земји заеднички испратија моќна порака дека природата нема граници, а грижата за неа е заедничка одговорност.
Во организација на Нуркачкиот Центар Амфора, дури 80 искусни нуркачи од Македонија, Хрватска, Србија и Босна и Херцеговина се спуштија во длабочините на езерото, каде наместо подводни убавини ги дочекаа отпад и човечка негрижа. Во текот на акцијата беа извлечени големи количества отпад од езерското дно, со што уште еднаш беше алармирано за потребата од поголема еколошка свест и посериозна заштита на Охридското Езеро.
Акцијата, освен еколошки, имаше и силен регионален карактер. Нуркачките тимови покажаа дека соработката меѓу земјите може да биде пример како заеднички се штитат природните вредности што му припаѓаат на целиот регион.
Во подводната мисија учествуваа Нуркачкиот Центар Амфора, Завод и Музеј – Охрид, Црвен Крст Охрид, КПД Охрид, СНК Врело, ЕНК Пена, САЕ Тигар, БСН Волци, хрватскиот клуб KPA Marsonia, како и српскиот Triton Tec Team.
Организаторите порачаа дека ваквите акции не смеат да бидат само еднодневен настан, туку континуирана обврска кон природата, особено кога станува збор за Охридското Езеро, едно од најстарите и најзначајни езера во Европа.
…
