Македонија оваа година влегува на светската мапа на спортскиот риболов со организација на едно од најпрестижните натпреварувања во оваа дисциплина: Светското првенство во риболов на крап, кое ќе се одржи на Мавровското Езеро и ќе собере околу 30 национални репрезентации од целиот свет.
Настанот, кој ќе се одржи од 1 до 6 септември, претставува историски исчекор за домашниот спортски риболов и најголем меѓународен спортски риболовен собир досега организиран во земјата. Натпреварувачкиот дел ќе трае 72 часа без прекин, според строгите правила на светската крапска дисциплина, а програмата ќе биде дополнета со свечени церемонии, медиумски активности и промотивни настани.
Претседателот на Риболовната федерација на Македонија, Филип Серафимовиќ, нагласува дека изборот на Македонија не е случаен, туку резултат на долгорочна работа, континуирано присуство на меѓународната сцена и активна соработка со Светската риболовна конфедерација ЦИПС и ФИПСед. Клучна улога, како што посочува, имал и природниот потенцијал на Мавровското Езеро, кој бил позитивно оценет од меѓународните комисии.
Организацијата на ваков настан, според него, претставува и голема развојна шанса. Освен спортскиот престиж, првенството носи директен економски ефект преку сместување, угостителство, транспорт и туристички услуги, но и долгорочна промоција на Македонија како дестинација за спортски и риболовен туризам. Во Маврово, за време на првенството, се очекува да престојуваат повеќе од 800 натпреварувачи, членови на екипи, судии и медиумски екипи од различни земји.
Според федерацијата, токму Мавровското Езеро ги исполнува сите неопходни услови за вакво натпреварување: од површина и конфигурација, до инфраструктура и сместувачки капацитети. Локацијата, сместена во рамки на Националниот парк Маврово, нуди и дополнителна атрактивност преку природната средина и пристапноста.
Во пресрет на светското првенство, Маврово ќе биде центар на неколку значајни риболовни настани – Државната крапска лига (мај–јуни), Балканското првенство (јули) и отворениот светски куп како подготовка во август, што дополнително ја зајакнува неговата позиција како регионален центар за крапски риболов.
Организацијата, сепак, носи и сериозни предизвици. Најголем меѓу нив е обезбедувањето доволен рибен фонд, односно крап, за исполнување на меѓународните стандарди. За таа цел, веќе е најавена координација со надлежните институции, меѓу кои Министерството за земјоделство, шумарство и водостопанство, Министерството за спорт, Општина Маврово и Ростуше и Националниот парк Маврово, како и со спонзори и општествено одговорни компании.
Серафимовиќ посочува дека институционалната соработка веќе функционира преку потпишан меморандум со локалната самоуправа и националниот парк, што создава основа и за идни меѓународни спортски настани во регионот.
Покрај организацискиот аспект, првенството се гледа и како развоен импулс за домашниот спортски риболов. Тоа подразбира повисоки стандарди во управувањето со водите, заштита на екосистемот, еколошка одговорност и професионализација на кадарот. Во процесот ќе бидат вклучени судии, тренери, волонтери и натпреварувачи, кои ќе разменат искуства со врвни светски екипи.
Како што наведува федерацијата, целта е Македонија постепено да се профилира како препознатлива дестинација за меѓународни риболовни натпреварувања на акумулации и природни езера, што директно би придонело и за развој на младинскиот спорт и рекреативниот риболов.
…
