Нова геополитичка тензија се отвори во Црно Море откако украински власти објавија дека кинески трговски брод бил погоден за време на руски напад со дронови врз украинската територија. Инцидентот предизвика внимание бидејќи се случува во момент на засилени односи меѓу Русија и Кина, непосредно пред најавената средба меѓу Владимир Путин и Си Џинпинг.
Според портпаролот на украинската морнарица Дмитро Плетенчук, дрон удрил во кинески комерцијален брод кој се наоѓал во украинските територијални води. Тој наведе дека нема повредени или загинати членови на екипажот.
„Интересно е што ги водеше Русите кога решија да погодат кинески трговски брод со ‘Шахед’ во нашето море вечерва. Немаше жртви, но ова е нешто ново.
‘Страшна грешка’, другари?“, напиша Плетенчук на социјалните мрежи.
Засега нема официјална реакција од Русија ниту од Кина за инцидентот, а не е познато ниту колкава е штетата на бродот.
Украинските власти тврдат дека нападот бил извршен со дрон од типот „Шахед“, кои руските сили често ги користат во нападите врз украинска инфраструктура и пристаништа.
Инцидентот отвори нови прашања околу безбедноста на меѓународниот бродски сообраќај во Црното Море, особено по интензивирањето на руските воздушни напади врз украинските пристанишни области.
