Тензиите меѓу Вашингтон и Техеран повторно се искачија на раб на директна конфронтација, откако американскиот претседател Доналд Трамп испрати ново остро предупредување до иранското раководство, оценувајќи дека „времето истекува“ за постигнување договор.
По разговорот со израелскиот премиер Бенјамин Нетанјаху, Трамп порача дека Техеран мора итно да реагира ако сака да избегне сериозни последици.
„Подобро е да дејствуваат брзо, бидејќи наскоро можеби нема да остане ништо“, изјавил американскиот лидер, нагласувајќи дека секој изгубен ден ја продлабочува кризата.
Во меѓувреме, дипломатските канали меѓу САД и Иран остануваат речиси замрзнати. Иранските медиуми тврдат дека Вашингтон одбил да направи какви било отстапки во одговорот на предлозите испратени од Техеран за прекин на конфликтот.
Полуофицијалната агенција „Мер“ оцени дека тврдата позиција на Белата куќа ги турка разговорите кон целосен колапс и дека шансите за договор се сè помали.
Според иранските барања, САД требало веднаш да ја прекинат блокадата на иранските пристаништа и да поддржат итен прекин на огнот на сите фронтови, услови кои администрацијата на Трамп категорично ги одбила.
Од Техеран, пак, пристигнуваат сè поостри воени пораки. Воениот советник на врховниот лидер, Мохсен Резаи, изјави дека иранските сили се во целосна готовност.
„Додека дипломатијата сè уште трае, нашите сили веќе стојат со прстот на чкрапалото“, предупреди Резаи.
Паралелно со дипломатската неизвесност, расте и стравот од нова воена ескалација на Блискиот Исток. Според извори блиски до израелската влада, Израел и САД интензивно координираат можни следни чекори доколку преговорите пропаднат.
На затворена седница со својот кабинет, Нетанјаху порачал дека Израел е подготвен за „секое можно сценарио“, додавајќи дека безбедносните служби внимателно ја следат секоја промена на теренот.
…
