Во фокусот на политичките и институционалните дискусии деновиве се најде прашањето за јазикот на кој се полага правосудниот испит во Северна Македонија. Темата повторно се актуализира по состанок на државниот врв со претставници на коалицијата ВЛЕН, како и по најавени студентски протести во Скопје.
На состанокот меѓу премиерот Христијан Мицкоски и копретседателите на ВЛЕН, Билал Касами и Изет Меџити, било отворено прашањето за можноста за употреба на албанскиот јазик при полагањето на правосудниот испит.
Според официјалните информации, соговорниците се согласиле дека решението треба да се бара преку усогласен и уставно заснован пристап, со цел да се обезбедат правна сигурност и функционалност на институциите. Од Владата порачуваат дека се работи на модел кој ќе биде во рамки на Уставот и Законот за употреба на јазиците.
Дебатата дополнително се засили откако претставници на ВЛЕН преку социјалните мрежи најавија дека правосудниот испит наскоро би можел да се полага и на албански јазик.
Оваа порака предизвика реакции во јавноста и меѓу студентските групи, кои најавија протест пред Камен мост во 16:30 часот. Протестот е втор по ред и е организиран со барање за овозможување на полагање на испитот на албански јазик.
Организаторите на протестот порачаа дека нивното барање е насочено кон еднаков пристап до правосудниот систем, а слоганот на собирот е „Обединете се со студентите – сите заедно“.
Прашањето претходно беше отворано и од страна на политички структури, меѓу кои и Демократска унија за интеграција, која во февруари поднесе кривична пријава против министерот за правда Игор Филков, обвинувајќи за непочитување на уставните и законските одредби поврзани со употребата на јазиците.
Од Министерството за правда беше појаснето дека барањето на студентите било разгледано, но дека правната рамка за правосудниот испит мора да се толкува во контекст на повеќе системски закони. Според ставот на министерот Игор Филков, постојните прописи не дозволуваат еднострана промена без поширока законска усогласеност.
Во пошироката дебата се вклучи и премиерот Христијан Мицкоски, кој се повика на уставните одредби и истакна дека евентуално полагање на испитот на албански јазик би било возможно само доколку претходно тоа е уредено со закон. Според него, актуелната правна рамка не предвидува таква опција.
