САД повторно го продолжуваат привременото олеснување на санкциите поврзани со руската нафта, овојпат за уште 30 дена, со што останува дозволена испораката и трговијата со сурова нафта и нафтени деривати од руско потекло што веќе се натоварени на бродови. Одлуката ја соопшти американскиот министер за финансии Скот Бесент преку објава на платформата „Х“, нагласувајќи дека мерката има за цел да им овозможи на најранливите држави непречен, иако временски ограничен пристап до енергенси.
Според образложението на Вашингтон, продолжувањето на изземањето е насочено кон намалување на притисокот врз глобалниот пазар на сурова нафта и спречување на понатамошни ценовни шокови, особено во услови на засилени геополитички тензии и енергетска нестабилност поврзана со конфликтот во регионот околу Иран. Ова е веќе трето последователно краткорочно олеснување на рестрикциите, по истекот на претходната мерка за време на викендот.
Сепак, реакциите не изостануваат. Критичарите предупредуваат дека ваквите исклучоци, иако ограничени и временски дефинирани, индиректно можат да ја зајакнат руската државна каса, бидејќи приходите од нафтата и натаму остануваат еден од клучните извори за финансирање на војната во Украина.
Американските санкции врз рускиот енергетски сектор се во сила веќе подолг период, а дополнителниот механизам на секундарни санкции продолжува да врши притисок врз сите меѓународни компании кои би соработувале со Москва, одржувајќи високо ниво на ризик во глобалната трговија со енергенси.
…
