Во Скопје денеска официјално стартуваше 11. Форум на Стратегијата на Европската Унија за Јадранско-јонскиот регион (ЕУСАИР), настан што годинава се одржува во знакот на македонското претседавање со оваа регионална иницијатива, како и со Јадранско-јонската соработка. Организатор е Министерството за европски прашања.
Под мотото „Accelerating EUSAIR: From Commitment to Impact“, форумот го претвори главниот град во средиште на регионален дипломатски дијалог, собирајќи на едно место високи државни претставници, делегации од Европската комисија, претставници на локални самоуправи, меѓународни организации, граѓанскиот сектор и млади од земјите од Јадранско-јонскиот регион.
Во своето обраќање на отворањето, првиот заменик-претседател на Владата и министер за европски прашања, Беким Сали, порача дека ваквите макро-регионални формати денес имаат сè поголема тежина, бидејќи претставуваат важен инструмент за поврзување, стабилност и приближување кон Европската Унија.
Тој нагласи дека ЕУСАИР одамна ја надминала улогата на класична платформа за соработка, оценувајќи ја како практичен канал кој ги поврзува државите од регионот со европските интеграциски процеси. Во услови на засилени геополитички и економски предизвици, според него, клучни остануваат заедничките политики, подобрата координација и инвестициското поврзување меѓу земјите.
Сали исто така порача дека проширувањето на Европската Унија треба да се гледа како долгорочна инвестиција во стабилноста и развојот на целиот континент, посочувајќи дека земјите од Западен Балкан мора да продолжат со реформските процеси и продлабочување на регионалната соработка.
Во рамките на форумот се одржа и состанок на министрите на Јадранско-јонскиот совет и ЕУСАИР, каде што беше усвоена Скопската декларација. Со овој документ земјите учеснички ја потврдија заедничката определба за зајакнување на соработката во регионот, поддршка на процесот на проширување на ЕУ и унапредување на заедничките европски цели.
…
