Во рамки на новиот пристап кон проширувањето на Европската Унија, пет земји членки: Австрија, Чешка, Италија, Словачка и Словенија предлагаат модел што би го забрзал приближувањето на Западен Балкан кон ЕУ преку постепено отворање на клучни делови од единствениот европски пазар.
Наместо класичниот процес во кој целосното членство е единствената награда на крајот од реформите, идејата е интеграцијата да се „распарчи“ во повеќе фази. Така, државите кандидати би можеле да добиваат пристап до одделни сектори како што напредуваат во усогласувањето со европските правила и во зајакнувањето на институциите, особено во делот на владеењето на правото.
Овој концепт, претставен во неформален документ што го пренесе медиумот „table.media“, директно се обидува да одговори на долгогодишниот проблем на замор од реформи во земјите од регионот. Според авторите, токму видливите придобивки, како пристап до пазарот, би можеле да ја одржат политичката волја и довербата на граѓаните во процесот на европска интеграција.
Планираната постепена вклученост би ги опфатила основните столбови на внатрешниот пазар на ЕУ. Меѓу нив се енергетските мрежи и трговијата со електрична енергија, дигиталниот простор, транспортните и логистичките текови, како и политики поврзани со стратешки суровини. Дополнително, се разгледува и олеснување на младинската мобилност и унапредување на прекуграничните движења преку побрзи и поефикасни процедури.
Документот беше презентиран на состанок во Братислава од австриската министерка за надворешни работи, Беате Мајнл-Рајзингер, пред колегите од Западен Балкан и групата „Пријатели на Западен Балкан“. Од таму беше испратена порака дека целта останува полноправното членство во ЕУ, но дека патот кон него треба да биде пофлексибилен, со можност одредени одлуки за меѓучекорите да се носат и со квалификувано мнозинство во рамките на Унијата.
…
