Зголеменото движење на бродови низ Ормутскиот теснец и новите политички сигнали од Вашингтон и Техеран повторно ја раздвижија надежта дека може да дојде до смирување на тензиите меѓу САД и Иран.
Според последните податоци од поморскиот сообраќај, овој стратешки морски премин во изминатите денови бележи значително поголема активност. Извештаите укажуваат дека само во период од една недела бројот на пловила што го минале теснецот речиси се удвоил, што аналитичарите го толкуваат како сигнал за привремено намалување на ризиците по бродските рути.
Дополнителен импулс за ваквите оценки дадоа и изјавите од САД. Американскиот претседател Доналд Трамп оцени дека тековниот конфликт би можел да добие брз епилог, додека потпретседателот Џ. Д. Венс порача дека во дипломатските канали со Техеран се забележува одредено придвижување.
Поморските компании кои го следат регионот известуваат за интензивирање на сообраќајот: во краток временски интервал се регистрирани десетици транзити, меѓу кои и танкери и товарни бродови под различни национални знамиња. Дел од нив, според податоците, се поврзуваат и со иранскиот бродски регистар.
Ормутскиот теснец останува една од најкритичните точки на глобалната енергетска мапа, низ која минува значаен дел од светската трговија со нафта. Секоја промена во безбедносната состојба во оваа зона веднаш се рефлектира врз меѓународните пазари и цените на енергенсите.
Во исто време, од Техеран пристигнуваат пораки за можен договор кој би вклучувал прекин на воените активности, укинување на санкциите и деблокада на замрзнатите ирански средства. Сепак, ваквите предлози во минатото биле предмет на несогласувања со Вашингтон.
…
