Австриските истражни органи отворија постапка против две лица кои се сомничат дека во текот на војната во Босна и Херцеговина плаќале значителни суми за да учествуваат во пукање врз цивили во опколено Сараево.
Случајот е поврзан со т.н. „Сараевско сафари“: тврдења за морбидна пракса во која богати странски државјани наводно доаѓале на линиите околу градот и од позициите на Армијата на Република Српска учествувале во гаѓање на цивилно население. Според истрагата, меѓу жртвите имало мажи, жени и деца, што дополнително ја засилува тежината на обвинувањата.
Поранешната австриска министерка за правда Алма Задиќ остро реагираше на наводите, оценувајќи дека самата помисла оти некој би платил за намерно насилство врз невини луѓе, вклучително и деца, претставува речиси незамислива форма на бруталност.
Во дел од сведоштвата што се појавуваат во јавноста се споменува и дека одредени учесници наводно плаќале дополнителни суми за да таргетираат најранливи жртви, меѓу кои бремени жени и малолетници, додека по таквите активности се враќале во релативно нормален ноќен живот.
Повод за повторно отворање на ова чувствително поглавје, според извештаи, бил истражувачкиот труд на новинарот Ецио Гавацени, иако австриските власти нагласуваат дека нивната истрага се темели и на други, независни извори на информации.
Контекстот на овие наводи се враќа во периодот меѓу 1992 и 1995 година, кога Сараево беше под долготрајна опсада. Според официјалните податоци, во тој период животот го загубиле повеќе од 11.500 луѓе, додека над 50.000 биле повредени во постојаните напади врз градот.
…
