Во Стопанската комора се одржа работен настан посветен на можностите што ги нуди ИПАРД 3 програмата, на кој домашни и странски претставници од бизнис-секторот имаа можност да се запознаат со новите услови за финансирање и модернизација во земјоделско-прехранбената индустрија.
Пред присутните се обрати директорката на Агенцијата за финансиска поддршка во земјоделството и руралниот развој, Даниела Иротова Лазарева, која ја истакна важноста на програмата како клучен инструмент за поттикнување инвестиции и технолошки развој во домашното производство. Таа нагласи дека преку ИПАРД 3 значително се олеснува пристапот до средства за модернизација, особено во секторот за преработка на храна.
Настанот собра голем број домашни претприемачи, а посебен интерес предизвика учеството на осум италијански компании, кои ги презентираа своите најнови решенија: од напредни технологии до современа опрема за преработка на месо. Овие технологии, како што беше посочено, сега стануваат подостапни и за македонските производствени капацитети, отворајќи нови можности за унапредување на конкурентноста.
Во рамки на дискусиите беше истакнато дека домашните инвеститори преку ИПАРД 3 можат значително полесно да дојдат до финансиска поддршка за ваков тип инвестиции, што дополнително ја зголемува атрактивноста на програмата.
На настанот се обрати и амбасадорот на Италија во земјата, Н.Е. Паоло Палминтери, како и претседателот на Стопанската комора, Бранко Азески, кои ја нагласија важноста на меѓународната соработка и улогата на комората во поврзувањето на бизнис заедницата со европските партнери и технологии.
…
