Вашингтон повторно ја затегнува реториката кон палестинската мисија во Обединетите нации, откако се појавија информации дека би можеле да следат визни ограничувања за нејзините претставници. Причината за ваквиот притисок е кандидатурата на палестинскиот амбасадор Ријад Мансур за една од потпретседателските функции во Генералното собрание на ОН.
Според интерни комуникации на американскиот Стејт департмент, за кои известуваат медиуми, во администрацијата на Доналд Трамп се разгледувала опцијата за дополнителни дипломатски мерки, доколку палестинската страна не се откаже од оваа кандидатура. Во документите се сугерира дека потегот на Мансур се оценува како фактор што дополнително ја усложнува ситуацијата околу американските напори за стабилизација на Појасот Газа.
Во истите забелешки се наведува дека евентуално неповлекување на кандидатурата би можело да доведе до одговорност што САД би ја припишале на Палестинската управа, како и до ревизија на веќе одобрени визни олеснувања за нивните претставници при ОН.
Мансур претходно веќе се најде под дипломатски притисок од Вашингтон, кога се повлече од трката за претседател на Генералното собрание, но остана во игра за потпретседателската позиција.
Инаку, палестинските претставници во Обединетите нации имаат статус на набљудувачи без право на глас во Генералното собрание, кое брои 193 држави-членки. Изборите за новото раководство на телото се закажани за почетокот на јуни.
…
