Вирална фотографија од ценовник на такси услуга во хрватскиот приморски град Задар предизвика бурни реакции на социјалните мрежи, откако корисниците ја опишаа како пример за „шокантно преценети туристички тарифи“.
Сликата првично се појави на Редит, придружена со саркастичен коментар кој набрзо ја запали онлајн дискусијата. За само неколку часа, објавата се прошири на повеќе форуми и профили, собирајќи стотици реакции и отворајќи широка дебата за цените на услугите долж Јадранот и начинот на кој тие се контролираат.
Најголемо внимание привлече деталниот ценовник со две различни тарифи, кои многумина ги оценија како „екстремно високи“. Во првата варијанта, почетната цена за возење, заедно со првите пет километри, изнесува 120 евра, а секој следен километар се наплаќа по 24 евра. Втората тарифа оди уште подалеку: старт од 50 евра, плус дополнителни 50 евра за секој изминат километар.
Дополнително, според ценовникот, чекањето или бавното возење се наплаќа околу 60 евра на час, што дополнително ја засили реакцијата на корисниците, кои ваквата пракса ја оценија како невообичаено агресивна ценовна политика насочена кон туристи.
Кога овие бројки се стават во реален контекст, според пресметки на хрватските медиуми, релацијата од аеродромот во Задар до центарот на градот, околу 12,5 километри, би чинела приближно 300 евра. За споредба, истата траса вообичаено чини околу 25 евра, додека преку апликации за превоз цената најчесто е значително пониска.
Реакциите на интернет беа претежно негативни. Дел од корисниците ваквите цени ги нарекоа „туристичка измама“ и предупредија дека ваквите практики можат да ја нарушат репутацијата на Хрватска како туристичка дестинација. Други, пак, отидоа чекор понатаму и шпекулираа дека ваквиот модел на наплата може да се користи и за прикривање нерегуларни финансиски текови.
Како контрапункт на целата расправа, дел од коментаторите нагласија дека најсигурен начин да се избегнат непријатни изненадувања е користење на апликации како Убер или Болт, каде цената е позната однапред и ризикот од непријатни изненадувања е минимизиран.
…
