Македонска државно-црковна делегација престојува во Рим во рамки на традиционалното чествување посветено на сесловенските просветители, светите браќа Кирил и Методиј, при што деновиве се одвиваат низа официјални, духовни и културни активности.
Посетата, која ја предводи претседателот на Собранието Африм Гаши, започна со работни и протоколарни средби во Ватикан. Во текот на денот, тој има аудиенција кај поглаварот на Римокатоличката црква и разговор со државниот секретар на Светата Столица, кардинал Пјетро Паролин, во рамки на дипломатската агенда на делегацијата.
Централниот духовен чин ќе се одржи утре во базиликата „Сан Клементе“ во Рим, каде што се наоѓа гробот на свети Кирил. Таму свештенослужители на Македонската православна црква – Охридска архиепископија, предводени од архиепископот г.г. Стефан, ќе одржат молебен во чест на просветителот чија мисија ја постави основата на словенската писменост.
Во рамки на програмата е предвидена и посета на базиликата „Санта Марија Маџоре“, каде што македонската делегација ќе положи венец на спомен-плочата испишана на македонски јазик, поставена како симбол на благодарност за историскиот чин на папата Адријан II, кој во 868 година ги благословил словенските книги донесени од браќата Кирил и Методиј. Делегацијата ќе го посети и местото на вечното почивалиште на папата Франциск.
Чествувањето ќе биде заокружено со културна програма во салата „Хорти Салустиани“, каде камерниот ансамбл „Консонанс“ ќе одржи концерт во чест на празникот.
Во составот на државната делегација се пратениците Никола Мицевски, Оливер Спасовски, Даниел Стојчевски и Беким Ќоку, како и министерот за култура и туризам Зоран Љутков. Црковниот дел од делегацијата е предводен од архиепископот г.г. Стефан, заедно со митрополитите г. Пимен и г. Георгиј, како и претставници на Македонската православна црква и Католичката црква.
Поклонението во Рим претставува дел од долгогодишна традиција која датира со децении наназад, а своите современи форми ги добива во 1969 година, кога за првпат е организирано масовно одбележување на 1100-годишнината од смртта на свети Кирил. Оттогаш, секоја година на 24 мај во Рим се одржува официјално државно-црковно чествување.
Инаку, 24 Мај, денот на светите Кирил и Методиј, низ историјата добивал различни форми на одбележување. Од 19 век се славел меѓу образовните и просветните работници, а од 2007 година во Македонија е прогласен за државен празник и неработен ден за сите граѓани.
…
