Новиот политички врв во Унгарија предизвика силни реакции откако беше соопштено дека е стопирана исплатата на отпремнини за поранешните министри од владата на Виктор Орбан, иако тие средства се предвидени со закон.
Според објавените информации, станува збор за фонд од околу една милијарда форинти, односно приближно 2,6 милиони евра, кој наместо да биде распределен на поранешните функционери, новото раководство најавило дека ќе биде пренасочен кон хуманитарни проекти. Одлуката ја соопштил новиот премиер Петер Маѓар, кој преку социјалните мрежи го критикувал системот на исплати, посочувајќи дека законските решенија за вакви надоместоци биле донесени во периодот на претходната влада.
Во неговите јавни настапи, Маѓар исто така алудирал на имотната состојба на поранешниот премиер Виктор Орбан, тврдејќи дека и покрај ограничените лични средства прикажани во официјалните документи, тој би имал право на значителна отпремнина. Пораката на новата влада била дека тие исплати нема да се реализираат во првичната форма.
Овие изјави повторно ја отворија дебатата за распределбата на државните средства и за влијанието на политичките елити во Унгарија. Дел од критичарите со години укажуваат дека блиски соработници и пријатели на власта се збогатиле преку државни тендери и проекти, создавајќи систем кој го опишуваат како затворен круг на политичко-економска зависност.
Како реакција на новонастанатата ситуација, од редовите на поранешната власт беше соопштено дека планираните отпремнини сепак ќе бидат донирани во хуманитарни цели. Повеќе функционери, вклучително и самиот Орбан, ја поддржале идејата средствата да бидат насочени кон детска установа во Закарпатскиот регион во Украина, каде живее значајна унгарска заедница. Со овој потег, практично бил избегнат директен судир околу исплатата.
Паралелно со внатрешнополитичките случувања, новата влада најавува и промена во надворешната политика. Според најавите, се очекува поостар тон кон Русија поради безбедносни инциденти во близина на границата, како и засилена дипломатска комуникација со Украина. Иако е најавено дека Унгарија нема да испорачува воена помош, се планираат разговори на високо ниво за прашања поврзани со правата на унгарското малцинство во Закарпатје.
…
