Министерот за надворешни работи и надворешна трговија Тимчо Муцунски учествуваше на состанокот на министрите за надворешни работи на земјите членки на НАТО, кој се одржа во Хелсингборг, при што во фокусот беа глобалните безбедносни предизвици и подготовките за претстојниот Самит на НАТО во Анкара.
На состанокот се разговараше за имплементацијата на одлуките донесени на минатогодишниот Самит во Хаг, особено во делот на зголемените инвестиции во модернизација на одбраната и зајакнување на одбранбените капацитети на земјите членки.
Во своето обраќање, Муцунски нагласи дека Западен Балкан и понатаму останува подложен на злонамерни влијанија од надворешни фактори и дека сè уште постојат безбедносни ризици, поради што регионот треба да остане високо на агендата на НАТО.
Тој ги претстави и приоритетите на Владата во исполнувањето на обврските преземени во рамки на Алијансата, со акцент на зголеменото финансирање на одбраната и зајакнувањето на домашните капацитети.
Министерот ја истакна и важноста од понатамошен развој на одбранбената индустрија и модернизација на индустриските капацитети, оценувајќи дека тоа е клучно за посилна Европа и посилно НАТО.
На состанокот беше потврдена и поддршката за Украина, при што Муцунски порача дека е неопходно да продолжи континуираната и предвидлива помош за земјата, паралелно со напорите за изнаоѓање праведно решение за воениот конфликт.
Министрите разговараа и за актуелните состојби во јужното соседство, при што беше нагласена потребата од засилена координација меѓу сојузниците и продлабочување на соработката со стратешките партнери на Алијансата.
