Германските здравствени власти алармираат поради нови случаи на борнавирус, ретка но исклучително опасна инфекција која може да предизвика сериозно воспаление на мозокот кај луѓето.
Последниот случај е регистриран во покраината Мекленбург-Западна Померанија, додека претходно заразени лица биле евидентирани и во Баварија. Иако станува збор за ретка болест, лекарите предупредуваат дека таа често завршува со тешки последици, па дури и смртен исход.
Според здравствените институции, борнавирусот најчесто се пренесува преку контакт со полски итрици, односно преку нивна урина, измет или плунка. Во моментов нема докази дека инфекцијата може да се пренесе од човек на човек.
Кај заразените се јавуваат симптоми како главоболка, висока температура, нарушувања во говорот и движењето, промени во однесувањето, а во потешките случаи може да дојде и до кома.
Германските власти апелираат граѓаните да бидат особено внимателни при чистење подруми, шупи и други простории каде што има глодари, како и да користат заштитни ракавици и маски.
Иако годишно се регистрираат мал број случаи, експертите предупредуваат дека борнавирусот останува една од најопасните вирусни инфекции поврзани со воспаление на мозокот.
…
