Компанијата „Спејс екс“ на Илон Маск го реализираше првиот тест лет на својата најнова мегаракета „Старшип В3“, која и покрај техничките проблеми и експлозивниот крај во Индискиот Океан, беше оценета како значаен напредок во амбициите за идни мисии кон Месечината и Марс.
Беспилотното летало беше лансирано од базата „Старбејс“ во Тексас, откако претходниот обид беше одложен. Ракетата успешно полета со активирани сите 33 мотори „Раптор“ и достигна суборбитална траекторија, при што распореди и 22 тест-сателити.
Сепак, мисијата не помина без проблеми. Дел од моторите не функционираа според планот, што спречи целосно контролирано враќање и повторно активирање на моторите во вселената. И покрај тоа, леталото успеа контролирано да се спушти во Индискиот Океан, каде што експлодираше како дел од планираниот крај на тестот.
Маск го оцени летот како успех и им честиташе на инженерите на „Спејс екс“, наведувајќи дека станува збор за „епско прво лансирање и слетување“ на новата верзија на „Старшип“.
Поддршка пристигна и од администраторот на НАСА, Џаред Ајзакман, кој порача дека мисијата е „чекор поблиску до Месечината и Марс“.
Ова беше 12-ти тест лет на програмата „Старшип“, а новата верзија на ракетата е висока 124 метри и претставува најголемиот и најмоќниот систем што досега го развила „Спејс екс“.
Тестирањето доаѓа во период кога компанијата се подготвува за можно историско излегување на берза, кое според светските медиуми би можело да биде најголемото во историјата на Волстрит. „Спејс екс“, покрај вселенските мисии, управува и со сателитскиот интернет-систем „Старлинк“, како и со компанијата за вештачка интелигенција „иксАИ“.
…
