Унгарската Влада донесе одлука за повторна забрана на увозот на земјоделски производи од Украина, со цел заштита на домашното производство и стабилизирање на пазарот. Одлуката ја соопшти премиерот Петер Маѓар преку објава на социјалната мрежа Икс.
Мерката опфаќа повеќе категории производи, меѓу кои говедско, свинско, јагнешко и живинско месо, како и замрзнат зеленчук и житни култури.
Од унгарската Влада најавија и подготовка на нов закон со кој ќе се создаде правна основа за продолжување на ограничувањата и во наредниот период.
Министерот за земјоделство и храна појасни дека претходните мерки биле донесени во услови на вонредна состојба, која во меѓувреме е укината, па затоа е потребно ново законско решение.
Унгарија првпат воведе забрана за увоз на украински земјоделски производи во 2023 година, по реакциите на домашните земјоделци дека евтиниот увоз создава притисок врз цените и пласманот на локалното производство.
Прашањето за украинскиот извоз на жито и храна стана актуелно по почетокот на војната, кога Европската Унија воспостави таканаречени „коридори на солидарност“ за полесен извоз на украинските производи преку европските земји.
И други држави од регионот претходно изразија загриженост поради зголемениот увоз од Украина, оценувајќи дека тоа негативно влијае врз домашните пазари и земјоделците.
