Украинскиот претседател Володимир Зеленски испрати официјално писмо до лидерите на Европската Унија, во кое остро реагира на германскиот предлог Украина да добие „асоцијативно“ членство во ЕУ без право на глас.
Предлогот, зад кој стои германскиот канцелар Фридрих Мерц, предвидува украинските претставници да можат да учествуваат на самитите и министерските состаноци на Унијата, но без можност да гласаат. Според Мерц, ова би била привремена фаза кон целосно членство, а воедно и чекор што би помогнал во напорите за завршување на војната со Русија.
Зеленски во писмото наведува дека ваквиот модел е неправеден за Украина и дека земјата не смее да биде дел од Европската Унија без право да учествува во носењето одлуки.
„Неправедно е Украина да биде присутна во Европската Унија, а да остане безгласна. Сега е вистинскиот момент да се напредува кон полноправно членство“, порачал украинскиот претседател.
Тој посочува и дека по изборниот пораз на унгарскиот премиер Виктор Орбан, кој беше еден од најголемите противници на евроинтеграцијата на Киев, се отвора нов простор за напредок во пристапните преговори.
Писмото на Зеленски е испратено до претседателот на Европскиот совет Антонио Кошта, претседателката на Европската комисија Урсула фон дер Лајен и кипарскиот претседател Никос Христодулидис, чија земја моментално претседава со Советот на ЕУ.
…
