Македонците од селото Горно Крчишта, во областа Полени во Албанија, традиционално го одбележаа големиот православен празник Вознесение Христово – Спасовден, кој воедно е и патрон на селската црква „Свети Спас“.
Во рамките на одбележувањето се одржаа богослужби во црквите „Свети Спас“, „Свети Димитрија“ и „Свети Никола“, каде верниците се собраа заеднички да го одбележат празникот и да ја продолжат долгогодишната духовна традиција.
На чествувањето присуствуваше и делегација на Автокефалната православна црква на Албанија, предводена од отец Јован Коровеши.
Во текот на празничните активности беше одржана и заедничка богослужба на која присуствуваа Македонци од Ербеле и Крчишта, како и лица со потекло од овие села кои денес живеат во различни градови во Албанија и Македонија.
Верниците посебно ја истакнаа грижата и поддршката од архиепископот Јоан за идната реставрација на црквата „Свети Димитрија“, оценувајќи дека ваквите активности претставуваат значаен чекор во зачувувањето на духовното и културното наследство на Македонците во овој регион.
На крајот од средбата било договорено вакви собири да се организираат почесто во текот на годината, со цел дополнително зајакнување на заедништвото и зачувување на верскиот живот.
Иако денес во овие села останале само неколку македонски семејства, а голем дел од населението се иселило, Македонците кои живеат низ различни делови на Албанија и Македонија и понатаму не го забораваат своето потекло, традиција и јазик, кој според сведоштвата и натаму активно се зборува меѓу нив.
