Олимпијакос и Реал Мадрид вечерва ќе се судрат во големото финале на Евролигата, во натпревар кој ќе го одреди новиот шампион на Европа. Финалната пресметка од завршниот турнир „Фајнал фор 2026“ ќе се одигра во арената Т-Центар во Атина, а почетокот е закажан за 21 часот.
Грчкиот гигант Олимпијакос ќе се обиде да ја освои својата четврта титула во историјата на Евролигата, додека Реал Мадрид, најтрофејниот клуб во натпреварувањето, ќе атакува на својата 12-та европска круна.
Правдата на финалниот натпревар ќе ја делат судиите Сретен Радовиќ, Роберт Лотермозер и Олегс Латишевс.
Олимпијакос во големото финале влегува без кадровски проблеми. Тренерот Георгиос Барцокас ќе може да смета на целиот свој состав, што претставува голема предност за грчкиот тим во пресрет на најважниот натпревар сезонава. Од друга страна, Реал Мадрид се соочува со сериозни проблеми со повредите. Шпанскиот тим ќе биде ослабен и без Усман Гаруба, што дополнително ги намалува опциите во рекетот и создава дополнителен предизвик за тренерот Серџо Скариоло.
Статистиката од регуларниот дел од сезоната покажува дека двата тима имаат различен стил на игра, но и дека финалето би можело да биде решено од мали детали. Олимпијакос ја заврши сезоната на првото место со скор од 26 победи и 12 порази, покажувајќи голема стабилност и одлична форма во клучниот дел од сезоната.
Реал Мадрид, пак, заврши трет со учинок од 24 победи и 14 порази, потврдувајќи дека и понатаму останува еден од најопасните и најискусни тимови во Европа.
Ова ќе биде трет меѓусебен дуел на двата клуба сезонава. Во регуларниот дел од Евролигата, двата тима забележаа по една победа.
Олимпијакос славеше убедливо во Атина со 102:88, а блескаше Тајлер Дорси кој постигна дури 37 поени. Претходно, во второто коло од сезоната, Реал Мадрид победи на домашен терен со 89:77, а повторно најдобар стрелец беше Дорси.
Вечерва погледите на кошаркарска Европа ќе бидат насочени кон Атина, каде два европски гиганти ќе се борат за најпрестижниот трофеј на Стариот континент.
