Американскиот Пентагон објави нов пакет декласифицирани материјали поврзани со неидентификувани аномални феномени (UAP), познати во јавноста како НЛО, отворајќи дополнителни прашања околу необјаснети воздушни појави кои со години предизвикуваат интерес кај јавноста и научниците. Според достапните информации, новиот пакет вклучува околу 160 документи, десетици видеа и аудио-снимки, кои сега се достапни преку официјалните американски платформи за јавен увид.
Материјалите содржат извештаи од воени лица, снимки од беспилотни летала, сведоштва и анализи на различни случаи на необјаснети воздушни појави.
Меѓу највпечатливите материјали се споменува снимка направена над Сирија во 2021 година, на која е забележан мистериозен објект што се движи со екстремно голема брзина.
Првичните проценки укажувале на необично движење, кое некои го споредиле со „моментално забрзување“ како во научно-фантастичните филмови.
Во друг случај, објект снимен од два американски MQ-9 дрона во Јужна Азија првично бил сметан за „вистински аномален феномен“, но подоцнежните анализи сугерирале дека зад него можеби стои поедноставно објаснување.
Пентагон потенцира дека и покрај големиот интерес и бројните теории на социјалните мрежи, објавените материјали не претставуваат доказ за постоење на вонземјански живот или технологија.
Американската канцеларија за решавање аномални феномени (AARO), која е задолжена за истражување на ваквите случаи, наведува дека значителен дел од инцидентите имаат конвенционални објаснувања, но одреден број случаи и натаму остануваат нерешени.
Во меѓувреме, дел од видеата што кружат на социјалните мрежи предизвикаа и контроверзии. Кај некои од нив корисници додадоа дополнителни објаснувања и тврдат дека одредени снимки се погрешно поврзани со новообјавените материјали, а некои биле оспорени уште во претходни години.
Американските власти најавуваат дека ова не е последниот пакет документи и дека во наредниот период се очекува ново објавување на дополнителни материјали поврзани со истрагите за необјаснети воздушни феномени.
И покрај тоа што мистеријата околу НЛО и понатаму привлекува огромно внимание, официјалниот став на американските институции засега останува непроменет – нема потврда за вонземјанско потекло на овие појави, а дел од случаите сè уште се предмет на анализа.
