Нови измени на законската регулатива би можеле значително да го променат начинот на кој функционираат компаниите за брзи кредити во Македонија. Според најавите, експозитурите за брзи кредити во иднина би требало да бидат оддалечени од казина и обложувалници, а ќе се ограничуваат и реклами со пораки како „брзи пари“, „брзи кредити“ или „продавница за пари“.
Овие најави доаѓаат од групацијата во рамки на Стопанската комора која ги претставува финансиските друштва што нудат брзи кредити. Иако од Министерството за финансии засега не откриваат конкретни детали, премиерот Христијан Мицкоски пред една недела потврди дека се разгледуваат законски измени во оваа насока.
Претседателот на групацијата, Никола Јошевски, оценува дека предложените измени сериозно ќе влијаат врз дел од финансиските друштва, но посочува дека тие сепак ја поддржуваат идејата.
Темата дополнително се актуализира откако Министерството за финансии пред два дена одзеде лиценца на една компанија за брзи кредити по спроведена вонредна инспекција. Постапката била покрената по пријава од граѓанин, а инспекциските служби утврдиле сериозни неправилности со кои, според институциите, биле доведени во ризик корисниците.
Од групацијата посочуваат дека затворањето на компанијата има и економски последици, бидејќи без работа остануваат околу 100 вработени, ќе бидат затворени 40 експозитури, а граѓаните кои веќе земале кредити ќе треба да продолжат со враќање на своите обврски.
Сепак, од таму потенцираат дека ваквите мерки не се новина. Откако пред две години беше донесен нов закон, досега се одземени вкупно 11 лиценци на финансиски друштва.
Главната цел на новите измени е да се намали ризикот од прекумерно задолжување на граѓаните, да се обезбеди поголема заштита на потрошувачите и да се зголемат транспарентноста и одговорноста во работењето на компаниите.
Во меѓувреме, финансиските друштва имаа рок до 15 мај да ги повлечат агресивните маркетинг кампањи, особено рекламите кои нудеа кредити со „0% камата“. Од почетокот на годинава досега биле изречени 22 парични казни за 16 компании, како и 23 наредби за отстранување на утврдени неправилности.
