Папата Лав XIV упати историско извинување за улогата што Светата столица ја имала во легитимирањето на ропството, признавајќи дека Ватикан со векови не успевал јасно да го осуди овој систем. Тој минатото на Католичката црква го опиша како „рана во христијанското сеќавање“, во потег што веќе се оценува како преседан во историјата на современото папство.
Иако претходни папи во повеќе наврати изразувале жалење за учеството на христијаните во трансатлантската трговија со робови, ова е првпат еден папа директно да ја признае и да се извини за улогата на самата Света столица и за историските одлуки на неговите претходници, кои во минатото им давале овластувања на европските владетели да ги потчинуваат и поробуваат оние што биле сметани за „неверници“.
Извинувањето беше содржано во првата енциклика на новиот поглавар на Римокатоличката црква, насловена „Magnifica Humanitas“ („Возвишена хуманост“), објавена во понеделникот.
Папата Лав XIV, кој е првиот папа роден во Соединетите Американски Држави, отвори и пошироки прашања поврзани со современите облици на експлоатација и зависност во ерата на вештачката интелигенција. Во документот тој предупредува дека човештвото денес се соочува со „нови форми на ропство и колонијализам“, поврзани со технолошкиот развој.
Како пример ги посочува нерегулираните работни услови и експлоатацијата на луѓе во процесот на ископување ретки минерали потребни за производство на чипови и развој на системи базирани на вештачка интелигенција.
Во своето обраќање папата нагласува дека страдањата на милиони луѓе низ историјата претставуваат болна спротивност на човечкото достоинство.
„Невозможно е да не се почувствува длабока тага кога се размислува за неизмерното страдање и понижување што го претрпеа толку многу луѓе, што е во целосна спротивност со нивното немерливо достоинство како личности бескрајно сакани од Господ. За ова, во името на Црквата, искрено барам прошка“, напиша папата Лав XIV.
Со овој чекор тој одговори на долгогодишните повици на афроамерикански католици, активисти и историчари, кои со години бараа Светата столица да преземе одговорност за сопствената историска улога во трговијата со робови за време на колонијалната ера.
Оваа изјава веќе предизвика силни реакции низ светот и се смета за една од најзначајните пораки на Ватикан во поновата историја.
