Русија упати предупредување до жителите на Киев, вклучително и дипломатскиот персонал и претставниците на меѓународните организации, да го напуштат украинскиот главен град „што е можно поскоро“ и да ги избегнуваат воените и административните објекти.
Руското Министерство за надворешни работи, преку објава на Телеграм, соопшти дека ќе следуваат „систематски напади“ врз објекти поврзани со украинскиот воено-индустриски комплекс во Киев. Во соопштението овие најави се образложуваат со, како што се наведува, „крвав напад“ врз универзитетска зграда и студентски дом во дел од Луганската област под руска контрола, каде, според Москва, загинале 21 студент.
„Ситуацијата достигна критична точка“, наведуваат од руското министерство, додавајќи дека целите ќе бидат локации поврзани со производство и подготовка на беспилотни летала, како и, како што тврдат, „центри за донесување одлуки и командни места“.
Во меѓувреме, украинскиот претседател Володимир Зеленски изјави дека во руските напади во текот на ноќта загинале четири лица, а околу 100 се повредени. Москва, пак, соопшти дека тие напади биле одговор на украински акции врз објект во Старобилск.
Од украинска страна се отфрлаат руските обвинувања, со став дека нивните сили таргетираат исклучиво воена инфраструктура и објекти што служат за воени цели, во согласност со меѓународното хуманитарно право.
…
