Кивито одамна ја носи репутацијата на едно од најхранливите овошја што можат да се најдат на трпезата, а често дури и се нарекува „природна витаминска бомба“. Иако науката не прогласила ниту едно овошје за апсолутно најздраво во светот, ова зелено овошје редовно се наоѓа на врвот на листите кога се споредува хранливата вредност.
Она што го издвојува кивито е неговиот импресивен нутритивен состав. Богато е со витамин Ц , дури и повеќе од некои цитрусни овошја како лимонот, а содржи и значајни количини влакна, калиум и различни антиоксиданси. Во 100 грама киви има околу 92 мг витамин Ц, додека истата количина лимон содржи приближно 53 мг.
Во секојдневната исхрана, кивито се поврзува со низа потенцијални придобивки за организмот. Истражувања укажуваат дека редовна консумација може да придонесе за подобрување на крвниот притисок, па дури и да покаже подобри резултати во одредени случаи во споредба со некои други овошни избори, како јаболката. Дополнително, неговата висока содржина на растителни влакна го прави корисно за варењето и може да помогне кај луѓе со проблеми со запек.
Кивито често се споменува и како сојузник во контролата на апетитот. Комбинацијата од ниска калорична вредност и висока количина влакна придонесува за подолго чувство на ситост, што може да биде корисно кај луѓе кои внимаваат на телесната тежина.
Интересен аспект е и неговото влијание врз сонот. Содржи природни соединенија како серотонин, кои се поврзуваат со регулација на спиењето. Некои набљудувања сугерираат дека јадењето киви пред спиење може да помогне во подобрување на квалитетот и траењето на сонот. Воедно, богатството од антиоксиданси како полифеноли и каротеноиди дополнително придонесува за намалување на оксидативниот стрес во организмот.
И покрај сите овие позитивни својства, експертите нагласуваат дека не постои „чудотворно“ овошје што самостојно решава здравствени проблеми. Кивито е извонредно хранливо, но најдобри резултати за здравјето доаѓаат кога е дел од разновидна и балансирана исхрана, во која место има и за боровинки, калинки, јаболка, авокадо и цитрусни овошја.
…
