Индија значително ги менува изворите на своето снабдување со нафта, откако нарушувањата на испораките од Блискиот Исток ја натераа земјата да се сврти кон подалечни и разновидни извори, покажуваат податоци од трговски извори и аналитичката куќа Kpler, пренесени од Ројтерс.
Како што ескалацијата на тензиите меѓу Израел, САД и Иран, заедно со ограничувањата во движењето низ Ормутскиот Теснец, создаваат неизвесност во енергетските текови, индиските рафинерии во април и мај го засилиле увозот на сурова нафта од Латинска Америка и Африка. Венецуела, Бразил, Ангола и Нигерија се меѓу клучните добитници на ова пренасочување на побарувачката.
Иако традиционално најголемиот дел од својата нафта Индија го обезбедува од земјите на Персискиот Залив, сега таа зависност се намалува, бидејќи рафинериите се принудени да ги балансираат ризиците и да бараат алтернативи. Дел од аналитичарите посочуваат дека токму несигурноста во регионот околу Ормутскиот Теснец ја забрзала оваа стратегија на диверзификација.
Паралелно со овие промени, Индија не се откажува ниту од руската нафта. Сепак, нејзиниот удел во вкупниот увоз бележи пад од речиси половина, сега учествува со околу 35 проценти од снабдувањето.
Вкупниот увоз во април се задржал на околу 4,57 милиони барели дневно, што е стабилно во однос на март, но сепак значително под нивото од истиот период минатата година.
Најголем раст во набавките од регионот на Заливот е забележан кај Обединетите Арапски Емирати, додека Саудиска Арабија останала на приближно исто ниво. Експертите објаснуваат дека токму овие две земји во моментот имаат предност, бидејќи можат да испорачуваат нафта и преку алтернативни транспортни правци, заобиколувајќи го Ормутскиот Теснец, критична точка за глобалната енергетска трговија.
Според првичните проценки, Индија би можела дополнително да го зголеми увозот на руска нафта во мај, откако привремено намалување било предизвикано од ремонт на една од поголемите домашни рафинерии.
…
