Европските берзи денеска бележат претежно негативно движење, додека енергетските пазари реагираат со нов скок на цената на нафтата, поттикнат од зголемената геополитичка неизвесност на Блискиот Исток.
Во раните утрински часови, околу 9:30, суровата нафта регистрираше раст од 1,52% и достигна вредност од 92,439 долари за барел, додека „Брент“ порасна уште посилно, за 1,73%, на ниво од 98,887 долари. Пазарните аналитичари ваквото движење го поврзуваат со стравувањата од можни нови нарушувања во снабдувањето, по најновите тензии меѓу Вашингтон и Техеран.
Како што пренесува CNN, американската војска соопштила дека извршила „одбранбени напади“ на југот од Иран, насочени кон пловни објекти за кои постоеле сомнежи дека поставуваат мини, како и кон локации поврзани со лансирање ракети.
Во меѓувреме, политичките пораки од Вашингтон остануваат мешани. Претседателот на САД, Доналд Трамп, изјави дека разговорите со Иран се одвиваат „во позитивна насока“, но истовремено предупреди дека американската воена акција на Блискиот Исток би можела да продолжи доколку дипломатските напори не донесат резултат.
…
